“BUS samalam ikam biasa bakisah bahwa di dunia ini kadada alif batitik, tanyata aku ada mandapatkannya,” ujar Palui.
“Cuba haja ikam bukai samunyaan kitab-kitab, baik kitab bahari apalagi kitab wayahini pasti kadada alif batitik. Kalu ada alif batitik itu bacaannya adalah i jadi lain alif,” ujar Garbus.
“Dasar pangaramput si Palui ini, mulai bahari sampai wayahini di pesantren mana haja nang ngaran alif itu pasti kada batitik,” ujar Tulamak mambila Garbus.
“Minggu tadi aku bajalanan ka Nagara, di sana banyak tukang wasi baulah ruda kapal, baulah mandau dan baulah parang.
Tarnyata wayah kutakuni siapa nang pintar baulah lading balati lalu dijawabakannya si Alif nang gawian manitik parang. Nah jadi buktinya ada alif batitik,” ujar Palui.
“Alasan ikam itu adalah alasan bakajal kada masuk akal wan nang kita panderanakan,” ujar Garbus.
“Kita bakisah lain haja,” ujar Palui maalihakan panderan.
“Bisa haja pandiran dialihakan tapi jangan jauh wan alif batitik alias tukang wasi tadi,” ujar Tulamak.
“Wayah aku mamasan baulah lading balati, supaya mata lading kuat maka aku minta dibanyaki wajanya,” ujar Palui.
“Barapa haraganya, laranglah Lui lading balati bamata waja,” ujar Tulamak.
“Sual haraga kada jadi ukuran, barapa haja kubayar asal bujur-bujur banyak wajanya. Tapi imbah lading balati itu tuntung lalu kami bahualan,” ujar Palui.
“Kanapa maka bahualan Lui padahal si Alif batitik itu tamasuk tukang harat di Nagara,” ujar Garbus.
“Aku marasa dikaramputi ulih si tukang wasi itu, karna wayah kutakuni banyaklah wajanya, lalu dijawabnya diulahakan sasuai parmintaan. Tapi imbah kucuba kutatakan kapalapah nyiur tarnyata mata ladingnya simpak,” ujar Palui.
“Jadi ikam dikaramputinyalah Lui, ikam ditipunya? ujar Tulamak.
“Dijawab ulih tukang wasi bahwa inya bujur-bujur maulahakan lading balati itu kada sadikit-dikitnya waja,” ujar Palui maulangi ucapan tukang wasi.
“Kalu kaya itu ikam nang kalah Lui ai,” ujar Garbus.
“Dasar ikam nang bantat, ucapan tukang wasi itu bujur haja,” ujar Tulamak manambahi.
“Kanapa maka aku nang dipadahakan bungul wan bantat, pasananku supaya banyaki wajanya supaya kuat tapi nyatanya mata ladingnya simpak,” ujar Paluihiran.
“Tukang wasi itu baucap kada sadikit-dikitnya waja, artinya kadada wajanya,” ujar Garbus manafsirakan ucapan tukang wasi itu.
“Ooo... kada sadikit-sadikitnya waja itu artinya kadada wajanyalah Bus? Kukira tadi kada sadikit-dikitnya waja itu artinya wajanya banyak banar,” ujar Palui kakalahan
diambil dari banjarmasin.tribunnews.com